قصيده في غلاء المهور

حوار الشعري بين شاب وعمه بعد ان تقدم الشاب طالبا الزواج بإحدى بنات العم، ثم شرع العم في طرح شروطه ومن بينها مهر وعمولات أبوة وأمومة وأخوة نقدية (الشيكات مرفوضة).. وكانت هناك طقوم الذهب والماس.. على ان يكون حفل الزفاف في قاعة فخمة ويشارك فيه زمَّارون وراقصتان (شوف التواضع لأنه لم يطالب بعشر راقصات)..

لنستمع الى ما قاله الشاب لعمه بعد ان سمع تلك الشروط:


قلت اذكر الله يـا عـدو المساكيـن
واستغفـره لا يبتلـيـك بعـذابـه
الظاهر إنك منت عارف أنـا ميـن
أنا لو ارقـا فـوق متـن السحابـه
ما جبت حتى نـص درزن مواعيـن
واضحك بكيفـك واعتبرهـا دعابـه
شروطكم هـذي شـروط المجانيـن
شروطكـم شغـل ابتـزاز ونهابـه
شروطكم تقصـم ظهـور البعاريـن
شروطكـم همّـن وغــم وكـآبـه
شروطكـم والله سيـوف وسكاكيـن
تذبح بنـات المجتمـع مـع شبابـه
وين الرضا والعطف واليسر والليـن
اللـي ذكرهـا الله بمحكـم كتـابـه
وين الصفات اللي أمرنا بها الديـن
وين اختفى نهج أهل النبي والصحابه
يا عم جعل اللي خلقنا مـن الطيـن
يرد عقلـك مـن خطـاه لصوابـه
ويجعل نصيبي عند غيرك قل آميـن
ويحسن عزا الصابر ويجزل ثوابـه
قال انت لو فكرت تفكيـر صاحيـن
ما شفت في مجمل شروطي غرابـه
حنـا بعصـر العولمـة والمزاييـن
ماهوب عصر الفلسفـة والخطابـه
الناس تسعـى للرتـب والنياشيـن
وانت اهتمامـك بالشعـر والكتابـه
والشعر ما ينفعك لو هـو دواويـن
ما دام جيبـك مثـل بيـت الخرابـه
يا بوك لا تسمع كـلام المصاخيـن
واسأل مجرب عاش في وسط غابـه
قلت الله اكبر يـا محـرر فلسطيـن
من يسمعك يحسبـك ذيـب الذيابـه
تراك شايـب راس مالـك رياليـن
والبنت ما تسوى جنـاح الذبابـه..
قال انقلع مالت على وجهك الشيـن
لا عـاد اشوفـك عندنـا يالزلابـه
قلت ابشر ابشر لكن الباب من ويـن
واقفيت من عنده على صوت بابـه
الموضوع منقول

[b]الله الله بجد قمه في الذوق سلمت اناملك ويعطيك الف عافية
ونترقب جديدك